東張西望 何生何太對話懶人包︳何伯唔理外界質疑「邊個女人呃我，我一定睇得通」鬧仔女「分身家，想我死」

GIRLAV

「新聞人物」何伯何太再次現身《東張西望》回應網民質疑，上次訪問播出後，唔少人大讚拎走老父450萬嘅細女醒目，又話何太同何伯交往不久就要求新婚老公拎100萬俾佢搞生意，似乎相當有嫌疑。

何太鍾意老公啲咩？
何太聽到問題之後，停咗一兩秒之後答「我咪鍾意佢愛錫我，我覺得幸福囉。佢幾捨得呀……試問一個女人，邊個唔希望搵個愛錫自己嘅老公？唔通我老公愛錫我都有罪？」、「應該羨慕我先生先啱！」，何太再次補充「我從來唔會呃人一分一毫」。何太強調「就算我老公90歲、100歲，佢都係錫我，我一樣係愛佢。我份人好簡單，我唔理佢年齡幾大，總之佢識得愛錫我就得。點解要當人哋獵物呀，我當佢係寶，好唔好？呀……啲人真係奇怪！」

何伯唔擔心被騙
何伯多次強調自己好清醒，何太唔係貪佢錢「根本我就挑通眼眉，邊個女人呃我，我一定睇得通！我十幾歲嚟香港，跑過江湖，我知㗎！我認為佢老實，靠得住，咁咪娶佢……我地有感情」。何伯又指住自己個頭話「我唔知幾清醒，我仲想上國內發展！想上珠海發展！」。

何太點解想拎何伯100萬做生意？
網民認為100萬唔夠搞咩生意，何伯就話「生意有大做大，有細做細」，而何太就不滿網民對佢睇法「又話我呃佢錢，又話我會袋嗰100萬落袋，就唔會去創業做生意」。何太話會錫住老公啲錢，而做生意都係想「賺多啲返嚟同佢一齊享受」。

何伯就覺得何太仲後生，打算俾愛妻搞飲食生意。「我就緊係想個老婆生活過得好啲啦，生意做得落去咁佢就唔使憂」。何伯坦言預咗蝕晒100萬，又話錢係佢賺返嚟，由此再鬧細女拎走450萬。何伯唔認為細女係想幫佢保住積蓄，反指外人唔知內情，「如果保管到我死，咁我點做生意呀？」。

何伯何太點睇網民回應
何伯直言當網民係「瘋狗」，「（網民）信晒嗰班反派，嗰5個忤逆仔女……佢哋唔理解，佢哋知唔知我細女捲走晒我啲錢呢？」。何伯順手鬧埋5個仔女「想我死！根本想我死！咁就佢哋分囉……450萬，每人分到90萬，袋袋平安囉！」

何太係咪有個18歲嘅仔？
網民踢爆何太之前有過2段婚姻，更同前夫生下嘅兒子已經18歲。訪問中何太冇承認定否認有個仔，但就話同個仔討論話「你阿叔（何伯）俾細女卷走晒啲錢，佢冇晒錢，臨老過唔到世，好淒涼。我囝囝就話『我唔讀書，我出去搵嘢做賺錢，返嚟養阿叔』」，更邊講邊落淚。

拎唔返450萬點算？
何太被問到如果拎唔返450萬，會唔會打工養老公，佢話「我一定會諗到生存方法……我老公唔畀我出去一個人打工，無論我而家去邊，我都會帶佢。我或者返大陸擺個地攤檔，喺街邊煎牛扒畀人食我都帶埋佢」。

LasCases

都幾好笑。

littletrumpet

重未睡醒!